三十出頭，結婚、買樓、生仔，一條龍殺到。三件大事中，買樓睇時勢，生仔要計生理因素，都有點被動；唯獨婚禮規模可以自主，但很多人都樂意豪花廿幾萬大搞。廿萬就算未足以做首期，都好好使。淨付登記費1020元與廿萬婚禮，幸福程度會有分別嗎？
伴娘裙顏色弄至反目
早前兩位女友人，因為伴娘裙的顏色襯唔襯、對鞋應該由誰付鈔、頭飾化妝包唔包等雞毛蒜皮，弄得好友反目，確實令筆者大開眼界。查實何只伴娘，家陣連姊妹團都要襯色，堆填區又多幾件只着一次的垃圾。又不是真正「陪嫁」，要那麼多花樣幹麼？
當年做老襯，開開心心食一餐就是，家要講排場，酒樓擺與五星酒店擺，明顯有階級分化。禮上循例由專業攝影師即拍即播，以示update（其實有多少人睇？），政府明明收你一千蚊就宣告婚姻有效，新人硬係鍾意畀幾千蚊請律師見證。還有席上必送無用小禮物，絕對是小企成功洗腦之作，尚未計宴後大量廚餘。
信我，用廿萬整靚愛巢、孝敬雙方父母，你的婚姻會更美滿！
讀者 環保仔
本欄園地公開，歡迎各界來信，以450字為限，請電郵至mailto:[email protected]，
註明《家》樓民講場，請留聯絡電話。編輯保留文章的刪減權。