有接近50年歷史嘅港式扒餐廳「美而廉」，喺旺角嘅總店因為業主收樓關係，已經鐵定做埋聽日結業。
自從傳出咗呢間老店告別嘅消息後，唔少新知舊雨都趕去幫襯，希望臨別緬懷一下那些年嘅情懷，店外不時排晒長龍，想鋸扒幾乎一定要等位。不過，美而廉嘅粉絲唔使失望，八方噚日收到風，美而廉已經喺大角嘴塘尾道搵到新舖，今個月底就會原班人馬重新開業。
八方噚日向美而廉老闆陳澤球求證，佢就話呢段日子班街坊熟客咁熱情支持，令佢好感動，佢又怕呢頭結業嗰頭又重開，會俾人怪佢哋，所以佢好低調，冇喺舊舖張貼搬遷告示，連熟客問到都唔講咁多。其實陳老闆肯繼續經營，班熟客開心都嚟唔切，又點會怪你呢？
座椅杯碟會保留
所謂夫唱婦隨，老闆娘陳太一樣擔心熟客怪佢，舊舖裏面嘅卡位座椅、牆上嘅巨型餐牌、盛載扒餐嘅鐵板同杯杯碟碟，都有熟客提出買嚟留念。陳太話新店會保留呢啲懷舊特色，呢啲都係非賣品。
