繼有公屋租戶俾房署狂追$0.45欠租，有位黃先生又同八方講，俾學生資助辦事處追一蚊債。呢位黃生上期還錢時唔知點解還少咗$1.9，學資處即刻做嘢，出信話佢逾期還款，其中9毫子神沙撥落下期賬單，但一蚊就要即刻還。
寄封信都要$1.4郵費，追嗰$1係咪好唔化算？學資處就話，只要欠款係$1或以上，系統就會自動出信，每個月閒閒哋都有幾萬封追數信，所以好難每封都睇一睇追幾多錢，但嚟緊會研究吓有乜嘢更好嘅方法追呢啲「小額錢債」。其實學資處成日俾學生拖數，上學年就被拖欠$2.88億；所謂聚沙成塔，一蚊都唔放過其實係可以理解㗎！