要揀一隻可以鹹魚翻生嘅體育股，海迪仲未睇得通住；但係要揀一隻翻身機會最渺茫嘅，海迪會貼中國動向（3818）。呢間公司嘅強項係「叠水」，照計有大把資源可以重整旗鼓。但睇返年報，佢近年投資得最多嘅並唔係品牌建設，而係數以10億元計（人民幣．下同）咁去買金融資產，有啲仲要蝕到阿媽都唔認得。
中動向09年開始買落咗唔少金融資產，投資過國債、商業銀行的財務產品，都算係正路嘢。但到咗舊年，公司再加碼10億投資金融資產，有2.3億係入股一間美國上市、叫麥考林嘅內地網購公司10%股份。
呢間嘢質素同本港嘅半新股有得揮，2010年上市後唔夠一年業績已經走樣，係美國被投資者質疑招股書內容有誤導兼搵笨之嫌，去年1月已經喺美國被人告要打官司。但中動向居然仲係3月，接私募基金紅杉沽出嚟手貨，每股ADS用6美元入股麥考林，上周麥考林收報1美元，即揸貨一年已經蝕咗80%！舊年中動向就撥備咗1.8億元，多過全年賺嘅錢！海迪覺得，公司有必要解釋點解要做單咁白痴嘅交易！
海迪