私募基金TPG之前一聲話要入股李寧（2331），大家就當正李寧好似有神仙打救咁，拿拿聲炒起股價。但神話總係幻滅得特別快，李寧公佈咗最新嘅業務數據，投資者先知自己太儍太天真，復蘇似乎仲係好遙遠嘅事囉。李寧CEO張志勇近日就話，今年TPG入李寧董事局，最主要係幫佢哋精簡流程，老套啲講，即係cutcost啦！華華喺度呼籲TPG：可以先由減高層嘅人工做起。
根據李寧最新公佈嘅2011年年報，舊年除咗老闆李寧本人比較克制之外，其他高層嘅基本薪酬都有得加。好似張志勇，薪金大增39%去到511萬元（人仔．下同），不過花紅、房屋津貼、認股權減番啲，整體人工先叫少咗18%，但都有成1156萬。
輕輕減咗兩萬八
李寧業績大倒退65%，呢個薪酬調整合唔合理，小股東可以自行判斷。至於CFO鍾奕祺，除咗認股權價值隨股價下跌而一定袋少咗錢之外，基本薪酬同花紅都增加咗37%及30%，整體人工去到491萬元。
老闆李寧之前賣樓、賣股狂套現，唔知係咪等錢使？之不過佢舊年人工只係輕輕減咗兩萬八，整體薪金397.7萬。華華建議除咗賣資產之外，李寧本人仲可以「賣肉」嚟搵真銀。大家千祈唔好心邪，華華係覺得李寧可以復出幫公司做model，賺埋個代言人費用，反正份年報個封面，都係影住一位體操大隻佬嘅心口，咁不如索性叫李寧真身示範，提醒大家公司仲係由李寧揸旗囉！
李華華
mailto:[email protected]