香港唔少網友都有玩微博，但「私博」你又聽過未？原來係一啲內地富豪嘅玩意，鍾意整番個私人博物館嚟收藏古董珍品。
放滿古玩字畫
有班接觸開內地豪客嘅地產經紀就話，內地富豪喺香港掃名牌，買貴價豪宅，出手豪氣唔在講，連開生日會都豪過人，佢哋喺內地開P搞生日會，唔似香港人走落去屋苑樓下會所book個場，又或者去麥記搞掂，而係去私人博物館。
呢類私博，唔單止外型華麗，有歐式建築，又充滿中國古典格局，入面藏品更勁，全部係私人珍藏嘅古玩、字畫、陶器……統統價值連城，郁吓投資額由千萬到以億計都有，喺大城市好似北京、上海，都有唔少呢類私博，喺呢度搞私人派對，檔次都高過人。
呢類私博除咗係家族留傳落嚟，有部份仲係地產發展商嘅投資，睇嚟香港若要追趕強國潮流，都要諗吓喺會所擺番幾件古董跟吓風。