華華平時貪方便，有時都會食個漢堡包就當一餐。對香港人嚟講，美國快餐連鎖業二哥漢堡王（BurgerKing，下稱BK）算係唔錯嘅選擇；但原來BK除咗賣包叻，玩財技仲叻。
BK嘅控股公司、由巴西資金支持嘅紐約私募基金3GCapital，會以現金價14億美金出讓29%嘅BK股份畀JusticeHoldings（一間倫敦上市嘅控股公司）。交易完成後，Justice會喺倫交所除牌，BK就會改名做BurgerKingWorldwideInc，喺紐交所申請掛牌。
睇番歷史，3GCapital私有化BK都未夠兩年，BK之前已經係一時上市一時又私有化，冇時定。有分析話3G會保留BK嘅71%股份，仲預計今年BK核心利潤可以比2010年翻一倍㖭。
不過，好多分析師都唔睇好BK上市，大圍意見係BK嘅死敵麥當勞之所以成功，就係因為有穩定嘅領導層，但BK就明顯缺乏穩定性，結果係點真係要拭目以待。