少奶B平時少理世事，每日早上行山，中午飲茶，下午學書法，生活寫意到極，佢平時唔多睇報紙新聞，不過特首競選期間，梁唐之爭街知巷聞，少奶B都難以逃避報紙與電視台之競選報導，估唔到佢幾讚賞唐太撐丈夫嘅態度噃，認為唐太係勇敢的女人，但因為梁生把口實在太叻，少奶B都覺得梁生高分一啲。
選舉過後，在上海總會碰到少奶B，佢話見到梁生一當選就去中聯辦請安聽訓示（梁生話係光明正大交換意見），就隱隱約約感到不安，至於點解，又講唔出，後來睇到名采高慧然之致唐唐公開信，就話高慧然解開佢嘅心頭結，但已經太遲了。左丁山話：「冇乜遲唔遲嘅，一介小市民點都難敵國家機器。以後你繼續行山寫書法，咪冇煩氣囉！」少奶B話：「我以前行山成日碰到董伯伯。見佢有時一路行一路講電話，好似有事放唔低咁，但喺三月二十六日早上見到佢行山，步履輕鬆神采飛揚，笑不攏嘴咁開心，我學到咁輕鬆就冇煩氣咯！」
唉吔，少奶B唔好咁天真嘞，董先生係挺梁大將，幕後為佢發功不少，梁生能夠當選，董生有一份大功勞，三月二十五日梁生贏咗，三月二十六日早上嘅董生梗係笑到四萬咁口啦，唔係嘅話，三月二十九日梁生駛乜親自到嘉慧園拜會董生呀！種種跡象顯示，董生班子藉梁生當選，重燃東山復出之望，昔日董先生之有為政策，隨時借屍還魂，反而曾先生挺唐，希望自己政策可以延續，就被無情棒打，離開禮賓府後，幾乎肯定係人走茶涼，難覓知音好友。
前輩C在香港會吃早餐之時教訓過左丁山：「要分清楚邊個係你可以往來嘅真心朋友與邊個係就任高職而親近之朋友，前者會長期留在你身邊，後者會與你嘅職位嘅接班人做好朋友，與離職後嘅你即刻變成陌路人！」唔，呢個故事以前聽過嘅嘞，大賓架L在位時，不少富翁稱呼佢做「L翁」、「L哥」，到佢退休之後在街上見到昔日大客，親切打招呼，大客直呼其名「L××呀，幾時食餐晏呀？」冇握手已經行咗去咯！可以預料，梁特首上任後，朋友急增，董特首亦門限為穿，曾特首就門堪羅雀，生活現實原是如此。