用地名、山水鳥樹或者吉祥語為廳房命名，大家早已見怪不怪。華華最近去到喺中環會德豐大廈嘅花旗私人客戶（CitigoldPrivateClient）服務中心，就發現每間會客室個名都好特別，就係用Tchaikovsky（柴可夫斯基）、Beethoven（貝多芬）同Chopin（蕭邦）呢啲顯赫一時嘅古典樂巨人嚟命名。
要似作曲家「夠準」
華華問番花旗人，原來當初為中環同旺角兩間私人客戶中心構思佈置，個idea係經過成班賓架一人一票，民主選出來㗎。佢哋覺得賓架應該要好似作曲家咁，識好多玩樂器嘅技能，先至可以「周身刀，張張利」；而且對每個音符都要捉得好準，同準確捉住客戶嘅需要一樣，先至能譜出財富增值嘅優美樂章。所以呢個比喻，比起最初篩選走嘅哲學家、寶石、地方名貼切得多。
但好似Tchaikovsky個名咁長，咪好容易讀讀吓變咗做「柴房」？花旗人就話熟能生巧，班同事都好習慣，冇出現呢啲叫法。兩個中心仲會提供雪梨蘋果茶、羅漢果水呢啲貼心服務畀啲貴賓，同成個格調唔係咁match喎，可能奶茶咖啡太普通啩。