無綫劇集《OnCall36小時》雖然播完，不過球場上搶救事件繼續發生，繼保頓中場梅姆巴心臟病發執番條命後，傑志前鋒盧比度日前操練突然暈倒，好在隊友佐迪變身馬國明，救番應屆香港足球先生一命。
近日天氣回暖，中午氣溫升至攝氏27、8度，唔知有冇關係，西班牙外援盧比度，星期一隨傑志喺石硤尾操練時，練咗30分鐘就突然暈低。由於之前外國發生保頓中場梅姆巴比賽期間心臟病發事件，全隊人都好緊張，擔心年屆35嘅盧比度安危。
就喺咁危急嘅情況，隊友佐迪即刻衝上前同盧比度急救，由於驚陷入昏迷嘅盧比度出現抽搐情況，佐迪就好似醫生咁，用手幫佢托住個下巴，30秒後盧比度果然醒番。我求大俠聽當時在場嘅鄭兆聰講，佐迪同盧比度急救時，佢就打電話call白車，盧比度留院一晚檢查後冇大礙，噚日已經出院。據講盧比度因為好容易肥，為控制體重，季內食量唔多，飲水亦偏少，而傑志總領隊伍健估計，今次盧比度休克可能同嚴重缺水有關；不過，為安全計，等隊醫容樹恆返港後，幫佢做個詳細檢查。
喺巴塞大學讀過醫科
至於做咗搶救英雄嘅佐迪，原來佢踢愛斯賓奴時代已經喺巴塞隆拿大學修讀過3年醫科及心理學，不過因為決定踢職業足球，所以冇完成課程，搶救急救技巧當然難唔到呢位準醫生啦！點解會係準醫生？因為佐迪決定咗遲吓返西班牙，會完成埋兩個學位，正式做醫生喎。
今日會喺將軍澳運動場同宋蘭義安踢亞協盃F組分組賽嘅傑志，因為盧比度唔係球會3個外援名額之一，所以對部署冇影響。至於月中對天水圍飛馬嘅聯賽盃決賽，盧比度又因為早前累積5面黃牌要停賽，所以可以等佢好好休息吓。梅姆巴事件後，英國球壇開始關注球員健康，包括香港在內，幾乎定期幫球員身體檢查係大勢所趨。
