家陣香港地豺狼當道，隨時冇啖好食。新界有農莊早着先機，舊年開始大搞有機稻米種植班，等平時食米唔知米貴嘅香港人，可以喺亂世來臨前學一技傍身。農莊莊主仲特登引入絲苗米，希望令曾經風光一時嘅「本土名牌」元朗絲苗重現江湖。
上水樂活農莊莊主黎明輝話，喺幾十年前，元朗大部份居民都係靠種米為生，飯香米靚嘅元朗絲苗，價錢貴過晒其他入口貨。不過香港家冇晒稻田，佢就諗到用有機農場平台搞導賞團，俾人學吓環保兼夾做假日農夫學種米。
唔會用便便做肥料
八方睇番資料，香港地最後一個米農，應該係1988年仲有喺東涌耕田打魚嘅發叔一家。自始之後，就冇乜聽過有人喺香港種米。
捲土重來嘅有機稻米一年有兩造，立春之後開始播種培苗，六個星期後可以將稻苗放入稻田插秧。因為香港氣候關係，第一造會先種油粘米，大概8月有收成；第二造再種絲苗，到11月就有土產絲苗面世。
農莊用嘅有機肥料，大家千祈唔好誤會係用佢哋嘅便便，其實肥料係用樹葉或者骨粉，加入自製環保酵素堆肥而成。黎明輝話︰「家陣都冇人倒夜香啦，邊有咁多便便做肥料。」佢話有機耕種有三不，唔用農藥、唔用化肥同唔用基因改造種子，總之夠晒天然就係正貨，真係粒粒皆辛苦㗎！
mailto:[email protected]