學生H係第一批高中文憑試考生，上星期正式投考異常緊張嘅文憑試，事實上，自一月中在學校考完模擬試以來，已有六七個周末冇返屋企食晚飯，左丁山問佢阿媽：「H仔去咗拍拖乎？」H媽嘆一口氣：「唔係有拖拍，而係去咗補習，學吓考試技巧，讀啲雞精班喎！」
卒之在考試前見到學生H，問佢去邊間補習天王補習，學生H話：「最出名嗰三間囉，三間去齊，可以攞到三份雞精，三份考試貼士天書吖嗎。佢地講嘅嘢，學校教晒嘅嘞，不過補習先生教答題目要點樣precise，點樣爭取答題目時間，務求答得晒，十分嗰條用多啲時間，五、六分嗰條就用少啲，唔好調番轉。」
考試入大學，按平均比率計，一百名中六生，最多只有十八個可以成功，其他人如要繼續升學，就要諗其他辦法。舊年記得提點學生H考埋托福與IELTS，萬一文憑試唔掂，就立即申請美國大學或社區學院，於是問佢考咗未，學生H話：「考咗IELTS嘞，得6分，阿媽唔係幾高興。」哦，佢阿哥在中大畢業，二年級時考IELTS得七分，表哥表姐留學美國，返嚟搵工都要考呢個試，兩人在老大不願意嘅情況下去考吓，得到8分，與學生H相比，自然係高啲，但學生H還只是高中生，應該有進步空間嘅。
香港學生以前只考托福，好似係約十年前，大學教育資助委員會開始資助每一位大學生考一次IELTS，於是每年都有近萬人投考，2010/2011年嘅各校成績以港大領先，平均有7.06分，中大居次只有6.96分，科大第三有6.75分，浸大第四6.57，理大第五6.55，城大第六6.43，嶺大第七6.43，教育學院第八6.36，而教育學院嘅畢業要求（2012/2013）係6分，現時政府聘請公務員嘅條件係6.5分，換句話講，以城大、嶺大、教育學院嘅畢業生平均IELTS成績入政府打工有啲難度，如果要在中學教英文，中學會要求畢業生嘅士哥達到7.5分至8.5分。教委會日後不再津貼學生參加IELTS考試，改為撥款資助大學培訓語文。左丁山對學生H講，考文憑試不必太緊張，成為一百人之中嘅十八人，自然高興，如果成為其他八十二人，仲有其他升學方法嘅！