嘩！八方今次真係好驚，好驚，好驚驚呀！自從狼振英齊心一意做特首後，狼營終於開始清算對佢「不利」嘅傳媒啦！唔使隻狼出面嘅，呢啲dirtyjob，由地獄班底出手就得啦。繼地獄班底之母羅范椒芬早幾日鬧選舉期間有傳媒揑造事實後，噚日清明時節，另一地獄猛將紀文鳳又出動兇傳媒啦，今次仲波及到八方㖭呀！
呢位狼營競選辦副主任噚日上電台炮轟傳媒，仲不點名話八方「揑造事實」。話說，八方上月初寫咗篇「振英日夜掛住習近平阿媽」嘅稿，話振英哥個「齊心」口號，同習近平媽媽個名一樣，有政界中人思疑佢擦阿爺鞋。
紀文鳳噚日秋後算賬話，「齊心」二字係佢度出嚟：「後來我睇過一張報紙話我哋要擦習近平媽咪鞋……可以睇到傳媒捏造事實啲嘢！」吓？係事實，又點樣揑造呀？「齊心」係狼英競選口號，而習近平的媽媽確係叫齊心，呢啲都係事實，八方加少少政壇中人嘅聯想，揶揄一下小圈子選舉有幾荒謬，竟然被打為「揑造事實」，八方認真見識到狼營有幾「包容」！阿紀小姐，出得嚟參選助選，就睇開啲啦！