曾經幫財爺鬍鬚曾畫漫畫推銷財政預算案嘅漫畫家李志清，早前借出三幅金庸武俠小說水墨畫《張無忌太極拳》、《黯然銷魂掌》、《白馬嘯西風》畀日本駐港總領事館喺九展搞「活力日本」活動，點知一借冇回頭，三幅4呎乘8呎嘅大作懷疑俾人偷咗。製作公司噚日下晝去北角警署報案，日本駐港總領事已下令徹查事件。
李志清噚日講起呢件事，不停大呻好慘，事關呢幾幅畫兩年前已經畫好，從未公開展出過，每幅價值逾10萬元。名作本來會喺6月於北京國家博物館展出，慶祝香港回歸15周年，家想畫都畫唔切，李志清呼籲有關人士主動交還，否則會追究到底！警察話將呢單嘢列作雜項事件處理。