雖然今時今日做香港人冇乜着數，但如果閣下唔係香港人，又想扮吓香港人生活，可以參考CNNGo噚日篇文，由外國傳媒解構香港人生活態度。記住啦，只要你捍衞到講嘢加「啦、囉、喎、㗎」尾音；食嘢前拎部手機影大特寫等核心價值，你都可以做個香港人。咦？講緊嘅生活態度，好似係港女特色嚟喎！
四字真言唔少得
要做香港人，唔單止要堅拒殘體字，講嘢仲要配合四字真言，每句話都要以「㗎（gar）、啦（la）、呀（ar）、喎（wor）」作結。即使講英文，都唔可以疏懶。例如HongKongisawesomela，一個「啦」字比感嘆號更有感情。
如果要講嘢講到好似香港人上身咁款，除咗加呢啲四字真言做助語詞，理解本地文化都係好緊要，對香港人嚟講，「便利店」嘅同義詞，叫做「Seven、七仔」、或者「OK」，皆因七仔同OK兩所連鎖便利店，喺香港幾乎做獨市。
好天落雨都擔遮
唔少港女夏天都會袋定把遮傍身。擋雨都係其次，把遮嘅真正用途，係要用嚟頂住夏日驕陽！香港夏天嘅暴曬指數有十粒星，男仔就話曬黑變古銅型仔啫，但唔少香港女仔以美白作為人生最壯麗而高貴嘅偉大事業，一曬即擋先至稱得上係正宗港女。要做香港女仔，唔單止要有遮，仲要記得袋定把防UV遮先算係王道，keep到自己嘅皮膚最Fanclwhite咁就啱晒喇。
先影後食咪心急
冇食過甜品，唔算食完一餐飯。食前冇影低幅相，就等於冇食過甜品！記住，但凡遇到稍為精緻美觀嘅甜品或者餸菜，千祈咪心急即食，因為港女嘅手機、相機會即時出動。指定動作係港女會側側哋拎起碟甜品、塊面幾乎貼住隻碟、三七面配Kawaii笑容、谷尖個下巴，影到自我感覺良好為止，因為放上facebook見人㗎！CNNGo嘅作者仲留意到，港人一影甜品要影幾set，包括甜品獨照（openrice之用）、自己同甜品合照、有閃燈、冇閃燈、同不同朋友嘅配搭等。
少甜走青好嘴刁
喺香港餐廳食嘢，成日都會聽到人喺茶餐廳叫「凍檸茶少甜」、「魚蛋麪走青加色」，一聽到有人咁樣落單，唔使叫佢攞身份證出嚟，都知道佢係香港人。
食完嘢埋單，點樣畀貼士先啱？CNNGo提醒，每張賬單已經包含服務費，所以唔使再畀太多，例如食餐五百蚊嘅，如果用現金畀錢，可以畀五個幾貼士就得。飲食界打工仔女認唔認同就係另一回事，八方只係依佢嘅報道直說咋。
mailto:[email protected]
