一位經常往來香港新加坡嘅成功商人A，為咗觀察鄉下（香港呀）嘅特首選舉，返嚟香港住三個星期，臨走前打電話嚟約飲下午茶，啱啱有小小空檔，大家就去HarveyNichols四樓餐廳坐低，閒談一個鐘。
商人A話佢嘅親戚錄低兩次特首候選人辯論俾佢睇，佢睇完足本之後，話唐梁二人之中，梁振英的確口才醒好多，但如果梁生繼續如此發揮佢嘅說話本領，香港市民見多十次八次以至未來五年見多幾十次之後，好可能唔鍾意，原因係梁先生之帶人遊花園本領太高，講咗等於冇講，根本滑不留手，完全唔實在。商人A話：「梁生如果做咗特首之後都係咁，只會落得有一個口甜舌滑之名，對佢聲望有損。」
唔講口舌之爭，講吓做事方法哩，商人A得到個印象就係梁生可能好崇拜李光耀，以後會仿效李光耀方法治港，但新加坡環境與香港完全唔同，咁做只會東施效顰，譬如話，幾十年前李光耀整治房地產，竟然委任地產商做諮詢委員會，提供地產政策意見，假如香港今天咁樣做，甚麼官商勾結，利益輸送之指責都出晒嚟啦，怎麼辦？左丁山問商人A：「係噃，點解李光耀夠膽委任地產商人管地產政策？」商人A眼仔睩睩，笑一笑：「第一，新加坡政府完全知道新加坡境內發生甚麼事，政府消息靈通到極點，冇人敢起飛腳；第二，新加坡冇傳媒及市民嘈生晒，亂罵政府不公。剩係呢兩點，已完全不是香港這一杯茶，你估梁振英上台後，可以在新加坡式環境下做特首咩？」
唔，又有報導話張震遠向新特首建議搞一間香港淡馬錫喎，得唔得呢？商人A批死唔得，佢話淡馬錫成立於上世紀六十年代新加坡工業不振，啱啱需要扶持之際，政府設立淡馬錫投資於不同產業，提攜佢地成長，培養佢地壯大，背後係產業政策之延伸，今日香港還有甚麼工業要政府大規模投資？幫港商工廠在內地發展，仲唔係利益輸送？商人A話顧問出身之人多數精於設計政策，但幹實務就要有生意人決策，梁振英之「十大門徒」（蘋果三月二十九日）全部係顧問階層，不見決策人噃，連佢自己都係做顧問出身㗎！