百事同康師傅（322）結盟得咗，好多人戥匯源（1886）唔抵。海迪就覺得匯源完全唔值得同情，事關過去三年係佢哋自己盲目擴張，使咗廿幾億喺啲低利潤、低回報嘅產能上面，仲掉轉頭強攻市場飽和嘅碳酸飲品市場，搞到公司債台高築，年年徘徊蝕錢邊緣。
老闆朱新禮近年仲醉心搞佢自己私人嘅上游果園業務（仲有供貨俾匯源添），海迪有理由懷疑佢對於上市公司已經無心戀戰，完全唔似為緊整體股東利益服務囉。
朱新禮當年已經明言，想將「匯源當豬來賣」，究竟佢係真心做生意嘅人？定係投機搵着數嘅人？大家自己判斷。
而事實證明，三年來匯源嘅市佔率係咁跌，而巨額投資換來嘅只係家超過24億嘅一年期短債，舊年利息支出仲多過佢賺嘅錢呀！睇市錯成咁，海迪陰謀論啲咁諗，過度擴產對公司盈利係無好處，但對谷大資產值就有莫大脾益喇。如果有一日朱新禮宣佈要注入上游業務嘅時候，海迪會奉勸各位睇緊啲。
海迪