【本報訊】多家體育股業績嚴重「走樣」，令投資者反思是否整個板塊已走到盡頭。綜合7家規模較大的香港上市體育股業績，總分店數目達4.24萬間，居然還多過全球擁有3.3萬間分店的麥當勞！有分析員斷言今年會出現結業潮。
記者：陳健文、吳綺慧
該外資分析員表示：「條數好簡單，你睇吓361度（1361）舊年平均單店產生嘅批發收入（營業額除以分店總數），只係得嗰30多萬元（人民幣．下同），所以喺呢個情況下應該好多分店都無錢賺，市場預期，今年市道會再差啲，關店壓力非常大。」
今年料關30%分店
他續稱，就算好像效益最高的安踏（2020）與李寧（2331），去年平均單店批發收入亦僅過百萬元，以他們的知名度來說並不理想。
他又表示：「再咁落去，我估計好多分銷商都會捱唔住，相信今年成個行業應該需要關閉20%至30%分店。」
陪隨着過份擴張，存貨及應收賬亦是市場的關注點。7家體育股去年應收賬總額倍增至約90.12億元，是總純利的1倍多！反映「放賬保增長」情況嚴重。
市場暫消化負面影響
市場人士普遍相信，今年將繼續是「清貨年」，預期要到明年才可初步解決存貨問題。
於市況回穩下，昨日多家體育股均表現平穩，只有上周公佈業績的李寧，股價再大跌近7%，似乎消化了業績的負面影響。
一名外資基金經理指經過多日「洗倉」，近日市場對體育股的負面情緒似乎有減退迹象。
他又說：「已經無之前印象咁差，多啲人講返，以前直情講都唔想講㗎！投資者見到有個別公司，好似特步（1368）咁，下半年情況有改善，整個市場嘅存貨水平又下跌緊，大家想搵吓有無turnround嘅機會。」
李寧仍有一年要捱
不過他強調，整個板塊表現相當參差，仍未是撈底時機，只有少數可以「諗吓」。他說：「特步同安踏叫好啲，topline（銷售）動力應該比其他公司好……李寧就未見到有強烈復蘇嘅訊號，起碼仲有1年時間要捱。」
此外，另一名分析員「貼」特步及匹克（1968）。他說：「我只係純粹睇估值同現金情況，覺得值博率較高，唔代表佢哋已經完全無事。呢兩隻PE得5倍左右，現金流又OK唔會執笠，如果銷售一有少少好轉，就會有re-rating（重新估值）。」
建銀國際消費股分析員陳兆昌認同，近日體育股市場氣氛確實有稍稍改善的迹象，不過，他並不預期市場可在短期內完全恢復，投資者要慎揀股。
陳兆昌說：「係無咁淡，不過要callbuy仲要等吓。投資者應該要揀現金流、應收賬健康，又唔係咁貴既股份比較好。」