星期日係4月1日愚人節，對利物浦名宿兼現時領隊杜格利殊嚟講，喺呢日承受咗個好殘酷嘅笑話，因紅軍唔單止喺英超聯作客紐卡素輸0:2，喺今年12場聯賽僅得8分，錄得58年嚟最差走勢；而佢喺79分鐘換走倒戈嘅前鋒安祖卡路爾嗰陣，仲要俾佢F、F聲咁問候㖭！
冇建樹兼插水
紅軍喺星期日作客輸紐卡素0:2後，今年12場聯賽只得8分，喺20支英超隊之中，淨係好過目前包尾嘅狼隊（見附表），係球隊58年嚟聯賽最差嘅走勢。另外，由於門將連拿喺比賽中頭撞紐記後衞白治被逐，令佢要停賽3場，包括喺4月14日對愛華頓嘅英足盃4強戰中停賽，對紅軍想爭今屆盃賽雙冠，打擊好大。不過，我求大俠相信最令杜帥心噏嘅，係俾自己嘅愛將安祖卡路爾粗口問候。
猶記得喺舊年1月，紅軍斥巨資以3,500萬鎊（約4.3億港元）呢個英格蘭球員轉會紀錄，由紐卡素羅致卡路爾，而杜帥當時仲將卡路爾捧到天上有、地下無。不過，可能「錢聚腳」嘅關係，卡路爾喺紅軍冇場好波，今季基本上唔多受重用；喺日前作客紐記時佢有得正選倒戈，但表現仍然麻麻，腳頭無靈兼插水想博12碼，並向話佢插水嘅紐記領隊柏度大講粗口。
被換走即爆粗
見到卡路爾咁嘅表現，杜帥惟有喺79分鐘將佢換出，但一向臭脾氣嘅卡路爾竟然冇同杜帥握手不特止，仲邊行邊爆粗話：「有冇搞X錯？X！（It'saf***ingjoke,f***off）」然後就撕爛件波衫。
最慘嘅係杜帥喺賽後仲要揸頸就命咁話：「我哋認為球員宣洩自己嘅不滿冇問題，不過就需要以更好嘅方法宣洩；卡路爾發咁大脾氣，都係因為對戰情同戰果不滿啫。」柏度則大講風凉話：「我替卡路爾可憐，佢其實係好球員，但今年諸事不順。」
講開愚人節，日前咪有報道指阿仙奴會推出球會香水，仲搵埋兵工廠中場韋舒亞宣傳，原來呢個係英國《太陽報》同讀者開嘅玩笑嚟㗎。