陳慧琳（Kelly）上月21日入院剖腹誕下次子「小龍包」劉琛，她日前已帶BB出院回家團聚，全家喜氣洋洋，升呢做哥哥的「蝦餃仔」劉昇非常體貼細佬，Kelly昨日在電話中說：「蝦餃仔好乖，佢見細佬成日瞓，蝦餃仔喺屋企保持安靜，畀細佬有覺好瞓。」
轉眼小龍包前日便出世十二朝，Kelly已準備好薑醋派親友，她又聽從長輩吩咐好好坐月進補，她說：「我有用薑水洗頭，我剛出院幾日食得清淡啲，方便餵人奶，過幾日就會開始進補。」為增加奶水，Kelly每天都會飲魚湯，今天剛兩周的小龍包體重已增到7磅。
「佢好鍾意冲凉」
Kelly在陪月幫手下，每天都替小龍包洗白白，她說：「佢好鍾意冲凉，不過BB實在太細，我一定要陪月幫手，暫時仲未可以一個人自己同BB冲凉。」Kelly也絕不偏心，也有為蝦餃仔冲凉，坐月期間雙手沒停過照顧兩子。當囝囝先後睡了，Kelly便會揀歌，為下月錄新廣東唱片做準備，她說：「我唔心急復出，但好多廣告商都開始搵我做嘢，我點都坐月唞夠先開工。」
為讓親友分享小龍包出世喜悅，Kelly計劃待他本月19日滿月便向傳媒發放全家福，小龍包才正式曝光，同時美心早已替Kelly安排好滿月禮餅，屆時她會送給親友享用。
採訪：比華利