舊年內地A股市場跌到仆直，將10年來嘅累計升幅一鋪過跌晒，好多內地股民都對A股市場鬧到「媽媽聲」，但其中一位股民最身體力行，佢趁住清明節就到，竟然幫A股燒金銀衣紙，仲話「A股已經死了，我給A股燒紙呢！」
輸咗廿萬人仔
話說呢位王先生，前日喺河南省高速公路揸緊車準備返鄉下拜山，點知途中睇新聞知道自己買嘅股票跌到停牌，投資50萬人仔，輸咗20萬，頹爆之下，竟然喺路中心停車，仲將拜山嘅衣紙攞出嚟燒，話要哀悼A股。交通警見到，就馬上埋去勸佢睇開啲，話股市只係生活一部份，唔可以當成全部，要勇敢面對生活呀。雖然王先生最後被罰款兩百同扣6分，但比起跌停牌嘅股票，只係雞碎咁多啫！