在中環街頭，碰到一位高官，寒暄幾句，最近梁班子消息滿天飛，都唔知啲高官如何過渡，邊位做邊位嘅波士，拜拜之時，順口同佢講：「GoodluckinthenewAdministration」，點知高官反應快到極，回應左丁山一句：「你應該講GoodlucktothenewAdministration」，哦，明白，大家微笑告別。
前輩Ｃ在香港會請吃早餐，左丁山急步前往，上到去，前輩Ｃ與博士Ｌ已經在座，兩位都係大忙人，左丁山做中間人約佢兩位見面，約來約去，午飯冇行，只好在早上匆匆見面。前輩Ｃ與博士Ｌ都係留學美國嘅，兩人一傾就傾得埋，無他者，一個U.Penn，一個哈佛，同是長春藤，文化唔會相差太遠嘅啫。前輩Ｃ向博士Ｌ請教出版之道，開正嗰瓣，博士Ｌ由英文出版講起，如何出中譯繁體本，中譯簡體本，如何發行，版權等等，原來有好多學問，同是一間跨國出版社，搵美國總公司出版與亞洲分公司出版，就有好多不同之處，出版之前要考慮清楚各種因素。左丁山冇資格出書，不過學吓嘢都好。
前輩Ｃ就話有咗阿瑪遜網站，少咗好多買書煩惱，譬如老友記去年出版咗一本英文書，本地書局訂咗極少量，好難買得到，但上阿瑪遜網站，居然可以一買就買到二百本，用嚟送俾個別客戶做禮物，有見及此，佢都去少咗書局，要買書就上網。
前輩Ｃ係人力資源高手，精於面試評估申請人是否適合做某份工作，例如CEO、大學校長……左丁山笑佢不如出山為新Administration選擇才德兼備之能人，埋班服務香港，佢連忙耍手擰頭：「老咯，老咯，冇資格！」其實「請人」呢樣功力，如太極內功，愈老愈深厚，中年人、年青人反為經驗不足。特登同佢講某位名人據傳會加入新政府，起碼報紙如是云云，前輩Ｃ即刻話：「呢位太好人，容易做了別人的早餐，最好還是留在商界。」唔，左丁山都同意嘅，梁錦松咁有大志，又受重用，都在官場跣低，受重創，其他人要清楚考慮種種不同因素至好講句「我願意」。