中國女電王李小琳噚日出席一個論壇，大談乜嘢叫唔幸福，佢話「攀比」會造成唔幸福。點先算「攀比」？即係喺消費上面鬥高鬥貴，但係李小琳成日都「閃令令」咁出場，叫人唔好攀比好似冇乜說服力咁喎。
身兼中國電力國際（2380）同中電新能源（735）主席嘅李小琳，噚日出席博鰲論壇解說「攀比」，大意係話攀比會令人越嚟越貪，得一想二得寸進尺，當你成日都唔夠人哋好嘅時候，就會造成唔幸福嘅感覺。
華華仲記得今年兩會開幕時，李小琳着住件粉色套裝出場，網民一眼就認出嗰套裝係意大利名牌EmilioPucci今年春夏新款，官網賣1,730歐元，折合14,540人仔。舊年中電國際股東會，李小琳身上仲有件Chanel2011年春夏系列，當時價值5皮嘢，仲要有錢喺香港都買唔到㗎！配襯同樣係Chanel嘅珠鏈，又價值1.24萬蚊，次次你都贏晒，咁咪好幸福？