蘋機會：美女Robot點頭Hi　細路怕醜

剛喺太古城擺檔嘅機械人晒冷Show，不但集合幾個國家嘅機械人作品，最大賣點係日本仿真人登場，呢位靚女，唔係，呢個女機械人驟眼睇同正常人無分別，識得眨眼講嘢甚至愁眉深鎖，表現豐富逼真，難怪小朋友被佢主動點頭問好嗰陣，都顯得怕醜兼不知所措。

記者：陳國輝
攝影：蔡家輝
Model：Vanessa@Zmodel、Thomas

65種表情　身價100萬

稱呼佢為機械人，倒不如用番真實名字：GeminoidF。佢出身於2010年，生父喺大阪大學有「日本當代機械人之父」稱號嘅石黑浩教授。透過一支專用咪，佢就任你呼喚同擺佈，流露出日本女性嘅服從美德，唔怪得佢個名簡寫係GF啦（女朋友）。
不過，呢位「演員」身價高達港幣100萬，唔係人人請得起！教授話，GeminoidF具備12個用嚟控制表情嘅儀器，臉部能做出喜怒哀樂共65種表情，身上仲裝咗動作感應器，可感應身邊人嘅行為，從而作出互動反應；至於現實生活中，GeminoidF已經被安排喺日本多間醫院，幫助病人舒緩緊張情緒，亦喺百貨公司櫥窗上做過模特兒，仲登台表演過㗎！

■講嘢時口形唔多夾，但表情有微妙變化，好勁。

■參照20歲少女嚟設計，老實講，真人索好多！

■皮膚幾乎零瑕疵，但注意GeminoidF只有頭部可活動。

互望對住你笑

現場所見嘅GeminoidF，雖然見唔到哈哈大笑等誇張表情，但教授話機械人已收集人類嘅表情數據，當身邊人對佢展露唔同表情嗰陣，佢會識得畀反應。例如小朋友眼睩睩望住佢，GeminoidF就會「睥」番佢微笑、點頭示好；戴上專用咪之後，仲可以直接同機械人「溝通」，指揮佢做做各種表情㖭。
但講到更似真人，反而係設計階段嘅Telenoid，其精采處係有一個「腦」，唔止識同你傾偈，仲識得安慰你，令人心情放鬆。計劃中將引入醫院、老人院等作實際應用。