拍拖以來錢嘉樂和湯盈盈表現低調，但自從傳婚訊後開始打破避忌，昨日兩人拍拖到山頂出席活動，盈盈扭計要嘉樂只可稱呼她做女朋友，而嘉樂不諱言因平日他們經常玩其他人，擔心若結婚擺酒會被玩殘，因此必須仔細考慮。
錢嘉樂和湯盈盈昨日拍拖到山頂出席「大同世界‧大愛同行」的愛滋病慈善步行，原本名單上沒有兩人，但嘉樂表示現身支持姪仔錢景峰，因活動由他做搞手，不過直至活動完也未見錢景峰現身。現場見盈盈穿上嘉樂一直喜愛的牌子BathingApe外套，果然近墨者黑。
記者要求兩人繞手合照，起初盈盈不肯，最後三催四請下才答允，兩人對望甜笑。問盈盈為何如此怕醜？嘉樂搶着代答：「佢係怕醜，我哋都係尊重大會，但又尊重傳媒。」有記者稱兩人為兩公婆，盈盈聞言即說：「唔係，係朋友咋。」嘉樂即護女友表示：「係囉，唔好快一步，佢咁咪蝕晒底，我都未求婚，我叫你做女朋友係咪sweet啲？」盈盈聞言即冧爆點頭。
一唱一和甜到漏
兩人早前傳婚訊，嘉樂直言：「如果結婚就大鑊，實畀人玩死。」盈盈馬上附和：「係呀！」嘉樂表示：「當日洪天明結婚，佢話以我哋平日嘅所作所為，第日結婚一定好大鑊，但我同佢講，你估我似你咁傻擺酒。」言下之意是否結婚也不擺酒？嘉樂又表示仍未作最後決定，記者笑言搞大些大家可以玩得開心些？盈盈即很驚地說：「佢哋真係玩得好盡。」嘉樂即取笑女友：「你諗吓你平時做過啲乜。」
莫可欣拒追多個
同場的莫可欣帶同三歲的囡囡符迦晴一同出席，問會否考慮追多個？莫可欣坦言：「年紀大啦，唔係咁易，有人提議人工受孕，但要日日打針好辛苦，其實有一個已好足夠，老公都話生瘡就OK。」現場見許穎（Phoebe）成身僵硬，原來她患上筋膜炎，中醫則指由骨火引起，幸好看醫生後已有好轉。
採訪、攝影：馬建華