力寶（226）資產重秤到不得了，呢類股份趁靜局價殘，好收集。力寶最新NAV?15.8元，現價（2.85元）嘅NAV折讓，高達82%，集團透過阿仔力寶華潤（156）及華人（655），揸住位於祖國及星洲物業及資產，好似上海力寶廣場、星洲星展大廈及華聯海灣大廈，件件噹噹聲。力寶有咁嘅折讓，直情係抵買。再講，力寶淨銀貸比率兩成唔夠，財務上穩陣到爆。家陣力寶股價郁都唔郁吓，但隨住牛市來臨，股價一反映，好似07年咁，股價就一枝箭扯到上8蚊樓上。同樣以07高峯價8.36元計吓數，力寶現價係講緊要升近兩倍先到位，到時，集團嘅折讓，仍然高達47%，拍埋同級地產股或者星洲房產股比，仲係大得離譜。
廣南高息折讓大
廣南（1203）2011年度純利Keep到兩億銀，但包括埋物業增值嘅非現金性收益，所以，實際PE唔止四倍咁少。但集團全年度每股派息5仙，息率4.5厘，繼續高息回饋股東，就好吸引。而廣南喺近三年低位載浮載沉，NAV折讓達到50%，亦平過同業一大截。呢轉吼住橫行底1.06元兜轉，博升20%到1.27元，未有耐上到NAV。
錢雋