在這個利益掛帥的時代，忠和奸其實豈有絕對？今日你以為自己係正義之士，難保他朝你又會棄明投暗。好似大家喺《生化危機》做慣殺屍英雄，嚟到新一集《OperationRaccoonCity》竟然掉轉槍頭幫Umbrella企業打工，殺屍之餘仲要殺人，滅口滅證據，新鮮感十足！
記者：韓繼聰
擅用隊員技能 人屍大混戰
今集故事將回歸到《ResidentEvil》第二、三集，以1998年嘅浣熊市作舞台。老玩家除咗發現場景有點親切，仲會撞番一系列舊作主角，而以Umbrella企業特工作故事切入點，亦補完了某些故事的細節，設計算係有心思兼有創意。
玩家今次控制一隊稱為USS嘅小隊，六名隊員各有所長，有擅於潛行嘅Veetor、槍法如神嘅Lupo、識控制生物嘅FourEyes、醫術高明嘅Bertha、鍾意炸到人阿媽都唔認得嘅Beltway，仲有偵察力特強嘅Spectre。玩家必需好好擅用各人能力，先可以同一眾喪屍及美國的SPECOPS周旋。筆者最欣賞是「被咬」設定，除咗逐漸扣血外，更有機會被感染，死後會變喪屍打番自己人，到時惟有忍痛「做瓜」同伴，呢個設定極有睇喪屍片嘅真實感！
連線人打人Fans無Feel
由於遊戲轉為動作射擊取向，因此連線模式亦成為本作重點。當中比較特別是「Heros」同「Survivor」模式，正當有Fans大嗌「我想做好人」，「Heros」模式就俾機會你揀番一眾主角出戰，小隊廝殺玩慣玩熟，但勝在夠晒親切感。
而「Survivor」模式就係筆者至愛，先要同其他玩家合力打喪屍等人救，捱到直升機到場，玩家們會因為唔夠座位，而由同伴變成鬼打鬼，夠晒現實！今集遊戲由以往解謎與動作並行，氣氛陰森，變成大堆頭喪屍殺戮，自然引來Fans不滿，唔少玩家都喪插：「無晒Feel！」亦有Fans話：「瘋狂殺戮唔係《生化危機》，不如等正傳第六集好過。」講句公道話，今集真係無乜《Bio》Feel㗎喇，但加入新元素都唔係壞事，大家當佢係隻普通打喪屍Game，其實都幾好玩。
《ResidentEvil：OperationRaccoonCity》
機種：PS3/Xbox360
類型：動作射擊
人數：1人（2-8人連線）
售價：$338
查詢：CAPCOMASIA（23661001）