究竟「窮」字點解？華華得到最潮嘅答案，就係410萬！利嘉閣叫價410萬嘅「窮人恩物」宣傳海報（圖）呢幾日喺面書瘋傳，當然俾網民鬧爆啦！
網民甲：「有400萬又點……咪又係窮人一個。」網民乙：「原來做窮人都要講資格……」隔籬張相都好頂癮，立坊一個634單位賣350萬，平過753平方呎樂悠居嘅「窮人恩物」（其實呎價爭75蚊），但竟然被形容為「年輕感覺」，唔通年輕人係窮過窮人？
放呢張相上網嘅，就係出名惡搞嘅司徒夾帶師傅。張相嘅真實性有幾高，華華唔知，但係利嘉閣出過唔少騎呢賣樓標語。舊年華華見過利嘉閣賣港島東樓盤嘅標語，竟然出現「青蔥歲月」、「望飛機場」同「全部入晒」，最怪係「頭文字D」同埋「野戰首選」，究竟賣點係乜，留畀讀者自己想像囉。