我求大俠希望，上天可以保佑患血癌嘅阿士東維拉隊長柏杜夫，仲可以保佑埋佢哋領隊麥利殊。點解？因為維拉搞吓搞吓被捲入降班漩渦。
維拉陣殘近績頹爆
唔開心嘅嘢往往會變成正能量，就好似因心臟病發而喺比賽時休克嘅保頓中場梅姆巴，保頓啲球員為佢而戰，聯賽即刻3連勝，仲要係自06/07球季以來首次喺聯賽連贏3場或以上，排名亦由第19位彈上第16位。排喺佢哋前面嘅維拉，亦幾乎有類似遭遇。
維拉隊長柏杜夫上周五證實有血癌，前晚球隊迎戰車路士，喺落後0:2下由占士哥連斯同列查積追成2:2，我求大俠以為佢哋都發揮到神奇力量；可惜到最後都頂唔住，輸2:4完場。由於昆士柏流浪（QPR）同韋根都好似保頓咁成功攞到3分，所以只係多佢哋3隊4分同5分嘅維拉，家陣個勢都幾危，餘下時間要為護級而戰。
維拉呢場波有8個主力因傷病缺陣，要派出多名小將，令車仔單W由1.67倍落到得番1.58倍。賽後麥利殊咁話：「我哋班小將表現冇令人失望。」談到現場為隊友打氣嘅柏杜夫，佢則表示：「柏杜夫係個硬漢子，佢好早就入咗場，佢嘅出現啟發到好多人，現場球迷亦激起咗一班小將嘅鬥志。最可惜我哋一分都攞唔到。不過好開心見到球迷咁支持柏杜夫同埋球隊。」
保頓昆士柏韋根齊贏
維拉近況真係好唔掂，近7場聯賽1勝2和4負，但喺佢哋下面嘅保頓、QPR同韋根就頗「弗」。保頓靠馬田柏杜夫、馬高斯阿朗素同奇雲戴維斯入波，作客反勝包尾嘅狼隊3:2，家陣狼隊比尾2嘅韋根少成6分，應該九降，故此降班賠率亦熱到得番1.05倍；狼隊輸波之餘，門將軒尼斯同中堅羅渣莊臣仲喺比賽時吵大鑊，真係樣衰到爆。
QPR就把握阿仙奴華美倫連犯兩次大錯，主場贏2:1，近3場主場搶到7分。韋根仲堅，以2:0擊退史篤城後，近7場聯賽攞到3勝3和1負。所以話，維拉唔驚就假，麥利殊喺最後7場聯賽，真係要靠上天打救！
知多啲
唔通麥利殊中三元？
嚟自蘇格蘭嘅麥利殊，係少數同時教過英格蘭中部兩大球會伯明翰同阿士東維拉嘅教頭。喺07年11月做伯明翰領隊，但阻止唔到球隊降班。而伯明翰喺佢帶領下，喺09年夏天重返英超，仲喺上季英聯盃決賽贏阿仙奴捧盃；但季尾最後6場聯賽輸5場，令球隊又衰喺佢手上。然而佢鬼咁好彩，喺舊年6月過檔維拉，連教兩間中部大會。維拉唔係冇機會降落英冠，如果真係嘅話，麥利殊就會大演帽子戲法，3次搞到中部大會降班，真係邪爆！