DrLo盧永仁近年活躍於微博界，兩年以來，一日三發微博，抒發內心感受，無心插柳之下，原來已經吸引咗成50萬的Fans，成為香港政商圈中的微博紅人。有咗龐大Fans，名人微博就會變成一個商機。
盧永仁擁50萬Fans
相比演藝紅人，50萬的Fans當然只屬小數目。但在芸芸香港政商名人當中，DrLo卻是數一數二的紅人。如果有在微博關注DrLo的話，都知道曾經任職麥肯錫、香港電訊（電訊盈科（008）前身）、花旗集團、中國聯通（762）等等的DrLo，喺微博少談政經營商之道，反而多講風花雪月，好似DrLo上周喺微博將佢於上海參加的紅酒基金晚宴公諸同好，而微博當中，更多的是DrLo的心靈雞湯金句︰
「生命中，有一個人可以去惦念，是緣分；有一個人可以惦念自己，是幸福……」
「就算是分隔兩地，就算是無法見面，就算感覺不到你的體溫，就算不能傳達我對你的心情，只要知道，那個對自己最重要的人，會在這片星空下的某個地方笑着，是非常幸福的事。那個重要的人會永遠活在我心裡，是非常幸福的事……（親愛的，送妳這花叫「莫忘我」ForgetMeNot......）」
「愛情能給予的回報不一定是幸福，而是面對自己內心一次無悔的肯定……」
DrLo每篇博文，都配上靚人靚相。佢話，閒時鐘意上攝影網站，預先將喜愛的相收藏，到發出博文之際，再揀選合題材的靚相配搭，希望令人心領神會。原來影星劉嘉玲亦係DrLo粉絲之一，DrLo之前同劉嘉玲食飯的時候，知道劉嘉玲好鐘意DrLo的博文，有時甚至存低DrLo的金句。
DrLo最初喺微博寫同朋友食飯的逸事、或者關於管理的事，後來抒發感受越來越多，「一日要開七、八鐘頭會議，亦要好理性思考，想喺微博寫嘅嘢比較感性些，唔想太大壓力。」DrLo的微博癮，始於兩年多前與顧紀筠等一班朋友食飯，聽到顧紀筠推介，興之所致齊齊開微博，「現時顧紀筠好像也不玩了，不過我仍在玩。」DrLo玩了新浪微博幾星期後，新浪就主動接觸DrLo，希望可以認證佢的身份，放到香港商界的名人榜上。
此後關注DrLo的人數就大增，現時佢的新浪微博就聚集了48.8萬Fans。去年，在內地擁有最多用戶的騰訊微博亦主動接觸DrLo，希望佢可在騰訊另開戶口，至今佢在騰訊微博Fans數目也升至5.7萬人。
模特兒發Twitter財
DrLo逾50萬Fans的微博平台，除咗賺盡人氣，亦帶來商機，DrLo同我哋講，「都有人問可唔可以放些資訊喺我個微博，佢哋話會畀返宣傳酬勞。」不過，DrLo覺得微博始終是一個抒發感受的地方，暫時冇這個考慮。
當新浪同騰訊都摸索緊微博的BusinessModel，其實有唔少人已經發微博財。有內地網站話，20萬粉絲的戶口，轉發每條微博就可賺500元人仔，至於好似DrLo有50萬粉絲，每條轉發費就最少值800元人仔，當然若然用戶是名人，價錢另議。由於Fans越多，叫價越高，於是有人專程製做冷笑話大全、愛情金句的微博，谷高Fans數目，欲藉此賺大錢。
美影星殺出血路
相比起國內每條微博幾百元的酬金，美國模特兒KimKardashian就真係透過Twitter賺好多錢。據美國雜誌《NewYork》講，Kardashian發一條140字之內幫客戶宣傳的Tweet（相等於一條微博），價值高達1萬美元。KardashianTwitter擁有逾1400萬個Fans，專攻社交網絡的廣告公司Ad.ly會幫佢統籌Twitter，度身訂造一個廣告Tweet，Kardashian有時也會身穿上最新名牌潮物，拍照放上網。
Twitter甚至成為影星的主要收入。美國電視喜劇《TwoandaHalfMen》影星CharlieSheen去年因醜聞失去工作後，就接觸Ad.ly公司，希望利用Twitter殺出一條血路。喺Ad.ly統籌之下，CharlieSheen就用佢誇張的Tweet，吸引唔少Fans。Sheen每條Tweet價值5萬美元，但對客戶來說，絕對物有所值，佢曾經幫網站internships.com發出一個Tweet。頭一個小時就為網站帶來9.5萬點擊率，48小時之內網站的點擊超過45萬次。
所以話，經營好一個微博，絕對是一條財路。
