選舉過後，「政府消息報」將有變動，試看近日有關梁振英新政府之消息，已逐漸向挺梁大報轉移，昔日之挺曾大報以後可能有斷線之虞，正是新人事新作風有恩報恩，大家識做，全世界都係咁嘅啦。林行止於三月二十七日在專欄透露，當年麥理浩唔高興佢嘅批評，咪又係暗令杯葛「信報」！
梁振英以低民望、低得票率當選，到電台講直選，言論值得注意，佢回應得票率低時，辯稱建制派有兩人競爭，故此拉低得票率，以後2017年特首普選，如果入閘門檻低，多人競選嘅話，可能人人得票率都低，故此2017年特首普選之門檻，可能要多加考慮！嘩，好呀，到時佢有在任主場之利，如果將入閘競選資格提高到三百票，民主派一定玩完，建制派亦難以有人挑戰，結果得番佢一位梁特首出選，得票率或高或低都冇分別啦。民主派議員及其他建制派議員如果連咁嘅言論都輕輕放過，直情有乖職守。
其實2017年特首普選，唔駛驚有太多人參選嘅，梁特首嚇定我地先嘅啫，一來泛民今年已建立一個初選機制，只派一人參選特首，建制派頂多有一位咁多（因為都要睇北京面色）嚟挑戰有意連任嘅梁特首，故此即使提名門檻降低到唐英年提議嘅120票，到時可能只有三個人參選，「梁特首」駛乜驚呀！今年曾有一位姓余嘅低知名度人士宣佈參選，結果冇人睬佢，湮沒無聞，到咗2017年，若有類似人士話要參選。咪又係一樣失敗！
未上任，已宣稱有意連任，受2017直選洗禮，跟住又講到要研究提名門檻，以免有太多人參加2017直選，連番說話，令人疑惑，只能推測佢係好想篤定住在禮賓府十年，與委內瑞拉總統查韋斯上任後，就修改憲法，取消兩任制，令自己可以做終身總統嘅做法，有異曲同工之妙。「蘋果」等非「消息報」如不能發揮監察作用，「梁特首」在有力護航之下，隨時可以暗渡陳倉，在2017年推出假普選。