彭浩翔執導、楊千嬅同余文樂主演嘅《春嬌與志明》截至前日上咗三日票房約700萬，已經過咗《志明與春嬌》第一集嘅總票房，《春》片口碑同票房都好好，諗唔到連周潤發上周五都一個人走咗去又一城戲院捧場。
由於部戲反應咁好，噚日彭浩翔、樂仔、王馨平、陳逸寧（演Isabel）同陳兆霞（演Brenda）等演員去咗旺角朗豪坊戲院謝票，王馨平喺現場話睇完樂仔演嘅《別問我是誰》MV唔敢正視樂仔，樂仔聽完即刻笑笑口話：「唔好玩X我啦！」
彭浩翔教戲爆粗
樂仔又講呢幾日去咗好多間戲院巡票房，又一城戲院啲阿姐八畀佢聽，話早兩日發哥一個人嚟過睇呢部戲，樂仔話：「雖然唔知真唔真，但聽到都好開心。」馮仁昭聽講發哥睇完話好好笑，對演Brenda嘅陳兆霞都留下印象。Brenda出現時，現場反應好好，佢謝票時同觀眾話：「拍完呢部戲，好多朋友話羨慕我可以攬黃曉明，我家要澄清，係黃曉明攬我至真。」引得全場大笑。
彭浩翔後來又爆料話演Isabel嘅陳逸寧，要佢喺部戲講句臭X係好難，因為佢好少講粗口，後來我要佢喺現場對住每個人講一次臭X，總算拍到呢場戲，噚日Isabel就對住彭導再演一次：「嗰條臭X叫你春嬌姐呀！」全場爆笑。
