蘋機會：名副其實Desktop　唔怕你手多

好多科幻電影中，主角在屏幕前有型地操作，呢啲唔再係幻想，Samsung的SUR40，便是主機屏幕一體化嘅電腦，橫放在架上，名副其實變成「Desktop」！最特別係支援52點觸控，五個人十隻手喺上面指指點點，上網煲戲打機都應付得嚟，絕對唔怕你手多！

記者：許福合
攝影：潘志恆
Model：Tobby、Pinky@PureModel

52點觸控任你篤

別以為SUR40只是一個40吋附加觸控功能的屏幕，當中其實採用了微軟的Surface2.0技術，主要特點是容許多人同時觸控，觀看及使用當中的數碼資訊。相比於初代產品，二代的SUR40可以話進入實戰階段，比起第一代更薄，放在架上儼如一張精緻茶几。屏幕表面用上Gorilla強化破璃，防撞防刮之外，仲有基本防水功能，所以你可直接當飯枱嚟用。試想像吓吃飯時，邊夾餸邊點歌煲劇睇facebook，係幾咁過癮嘅一件事！
SUR40豪上40吋Touchscreen，兼且16:9全高清，其觸控功能更同時支援52點，即係五個人50隻手指同時亂篤，都可偵測及作出反應，亦容許同時開啟多個不同程式，就算一班人圍埋玩唔同軟件，都唔會爭崩頭。

■SUR40主要係靠觸控屏幕操作。

■容許同時操作不同軟件或檔案。

■可同時52點觸控操作，多幾隻手一齊玩都無問題。

貼標籤懂辨認物件

Surface2.0是以《Windows7Pro》為系統平台，需採用支援Surface2.0的軟件，才能發揮多點觸控特色。而其4吋厚機身已內藏電腦主機，不過硬件規格唔算頂尖級，例如處理器只係雙核的AMDAthlonX2，配4GB記憶體及320GB硬碟等，實際試用了幾款Surface2.0軟件，操作亦算順暢，但若要轉換程式，反應就有點跟不上了。
SUR40還有一項過癮玩法，就係內置識別功能，電腦懂得辨認屏幕上嘅物件，包含特定標籤的物件，如QRCode等，並且可即時作出反應。例如one2free就即場示範，將特定標籤貼喺手機背面，繼而擺喺SUR40上，咁電腦就即時顯示手機規格及服務等內容，非常方便，呢項功能未來應該有大把實用性。