蔡少芬（Ada）自從同內地武術指導張晉結婚之後，生咗囡囡楚兒，一家三口好開心，蔡少芬仲成日將楚兒啲得意相放上微博，同粉絲們分享楚兒嘅成長點滴。
着露肩泰山裝
大前日Ada就將一張老公張晉同楚兒一齊着住泰山裝，露出左邊香肩嘅性感照放上微博大晒溫馨，佢仲搞笑話：「有看過如此感性……性感的父女嗎？」相入面睇唔到楚兒同張晉嘅正面，不過兩個人望住同一個方向，好有默契。網友睇到呢張咁搞笑又溫馨嘅相，都話Ada幸福，覺得佢哋三個成日玩埋一齊，Ada真係嫁咗個好老公。
自認過期奶媽
咁Ada都好關心其他有仔女嘅藝人朋友，噚日生日嘅吳啟華喺微博放咗囡囡嘅相祝自己生日快樂，Ada都有留言祝福：「生日快樂健康、開心、幸福伴隨你。」
Ada最近都好忙兼同宮廷片好有緣，佢之前喺大陸拍嘅宮廷片《甄嬛傳》家係大陸播緊，聽講反應都唔錯。前排佢就返咗香港幫無綫嘅《金枝慾孽貳》開工，劇入面佢扮奶媽，已做咗阿媽嘅佢搞笑話自己係「過期奶媽」。