錢搵錢:土狼當道 英狼當殃 - 蘋果波神

錢搵錢:土狼當道 英狼當殃 - 蘋果波神

土狼殺到,有權威評論指香港將逐步去英化,是好是壞,你我也在見證,不如先睇香港地產巨賈家族內訌仲過癮。英超鬥爭近廿年,季季燦爛,尤其到季尾,上下游球隊個個咬緊牙關,博彩重心近排變易捉。彼邦的「狼」,今季卻特弱,走了首領,亂晒陣腳;今聯賽殘陣迎戰士氣正處高位嘅保頓仍成熱門,護級大戰,當捧下盤兼冷W。
小圈子選舉無法百花齊放,但小弟也盡了綿力,成22萬多「全民投票日」嘅一分子,還望5年後,大家也有權選特首;英超,幸得本地收費電視以十數億元爭奪轉播權,播波也百花齊放不惜工本,累得年年業績大紅。像今晚全部7場波開10點,球迷可任意扭台選擇;講睇波,當不會錯過贏到唔識停嘅阿仙奴,作客昆士柏流浪繼續擺全攻型,但講投注心水,必選有分頭嘅保頓作客殘狼受讓下盤固然穩,客W有2.88倍嫌偏熱也要一試。
用體力加戰意推敲季尾波,近來成績不俗;狼隊踢走名領隊麥卡菲,只由副手頂檔後戰績更劣,近4戰全敗入1球失14球,傷兵成籮,最慘中場冇咗奧哈拉同史堤夫亨特後,打開兩截,愛爾蘭射手奇雲杜里啞火,整月冇進賬,來季呢隻包尾狼應該英冠見。
對手保頓現績好不了多少,排尾4只較狼隊多4分及踢少一場;不過自中場梅姆巴逃出鬼門關,看到場上士氣更盛。班波今季作客只有贏及輸,4勝對手包括排名相若嘅昆士柏、韋根及布力般;而且季尾每戰搶3分為目標下,起碼用當fit嘅「阿亮」支援卡斯歷、奇雲戴維斯及尼高治任何一位箭頭,也見保頓今戰有能力締聯賽3連勝。季尾波可以好極端,何妨再追。
另一選擇繼續在英冠尋寶,今次選本周重頭大戰雷丁作客韋斯咸,取入球「大」及雷丁客W;韋斯咸上周二果然在息息相關嘅彼德堡身上重拾勝績,但班波老兵多,計體力及近績,唞咗成個禮拜嘅雷丁變得有優勢。2、3哥今戰碰頭若再和,勢難追到榜首修咸頓,反正排第4位起球隊起碼有10分距離,希望兩軍喺下周中無賽事下,今戰放手一博;入球「大」又係冷到震嘅2.1倍,最啱胃口。希望今天心水,能助小弟在3月擂台戰笑到最後。
下次見報(31/3)
蘋果波神

今日重心推介

熱選
韋斯咸大(2.1)

冷選
保頓勝(2.88)