諸葛紫岐早前嫁做Neway細少奶，但婚禮風波不斷，被笑婚宴似春晚、菜式貨不對辦外，更傳與她不和的陳法拉根本無送過賀禮。諸葛前晚行騷時，一一反駁婚禮是非，但當提到陳法拉無送禮，她即默認，更由助手代答，指陳法拉無當面祝賀，妯娌不和再度升溫。
婚後繼續搵銀的諸葛紫岐（Marie），前晚在銅鑼灣出席「SOGO春夏服裝滙演」，和徐靜雯等一齊行騷。她謂近期無暇造人：「呢排好忙，又病，唔得閒趕呢樣嘢。」她和薛嘉麟的近100圍婚宴，事後被大踢爆菜式一般，大堆不搭調的表演形同「春晚」，而她的婚紗晚裝更是幾百元的內地貨，她說：「八卦花邊嘢梗有，所有嘉賓開心就得，我好感恩，唯一係希臘女神（她代言的婚紗品牌）用咗好多時間幫我設計造型，絕對唔係外面所講。」
讚婚宴值100分
Marie指婚禮上的表演由老公負責：「我覺得好精彩，可以一邊睇一邊食，朋友都話啲菜式好食，我覺得婚禮係100分！」她高EQ回應婚禮，但問到陳法拉被指其實無送賀禮，她即停一停，諗一諗說：「過咗去嘅唔好講啦，嗰晚大家開心就得啦。」
「總之開心就得」
記者叫她拎法拉的賀禮出來分享，她只好默認無收到：「總之，大家開心就得。」答完又怕答錯，即時推波給助手說：「到底有定冇啫？放咗去邊呀？」再解釋指婚禮賀禮未拆完，就算無送，只要一家人開心就得。至於外傳法拉無當面祝福她？Marie又拉住助手求助，助手也承認：「有透過傳媒送上祝福。」言下之意，即陳法拉無祝賀Marie。此外，徐靜雯指完騷後，會陪生日的男友周子揚吃飯，昨日再補祝生日。
採訪：盧妹
攝影：林德雄