無綫製作資源部總監樂易玲昨日出席2012年港姐招募活動，她說本有意邀請剛生完BB返港的楊思琦出席，不過與思琦對話時，發覺她情緒不穩，覺得她有情緒病，甚至產後抑鬱，所以希望她看醫生之餘，也盡快收拾心情工作，並相信這才是最好的治療方法。
無綫《2012香港小姐競選》昨在尖沙嘴開記招，歷屆港姐包括徐子珊、朱晨麗、許亦妮、黃智雯及無綫製作資源部總監樂易玲等出席。
想思琦就醫
未婚產子的楊思琦自從由美國帶女回港後，一直沒露面，問到樂小姐有關思琦近況，她擔心說：「佢返咗嚟咁耐都冇出過街，一直用電話聯絡，本來諗住叫佢嚟呢個活動，但噚日（前日）同佢傾電話，覺得佢情緒唔穩定，以我見咁多人嚟睇，覺得佢有情緒病，甚至產後抑鬱，希望佢睇醫生。」
問樂小姐會否探思琦？她說：「佢屋企人喺度好難傾偈，去其他地方見面會好啲。佢連經理人拎嘢畀佢，都叫媽咪落樓攞，唔想見人，見佢咁真係哋，好慘，戥佢肉緊，唔可以咁落去。」再問樂小姐會否與思琦媽了解？她說：「同思琦媽唔熟，其實最好醫療方法係寄情工作，希望佢盡快收拾心情工作，一做嘢意志力就會出嚟，家都有啲工作搵佢做，但未知佢幾時開得工。」
另外，港姐大會統籌經理余詠珊指今年是港姐40周年，賽制有別以往，佳麗即使素顏上陣亦要以靚為主。比賽於八月底舉行，初步計劃招募30至40位本地佳麗，以淘汰形式進行，到最後剩下十多位佳麗爭冠軍，而今年將到倫敦外景。
唔想揀豬扒
至於會否提升質素，以免再有豬扒港姐，余詠珊說：「唔會有人想揀豬扒，所以希望吸引多啲靚女參加。」
採訪：何慧斯 攝影：陳順禎
