如果當年我第一眼認識韋斯咸時，它是在次級聯賽也文也武的話，我應該對它一點興趣也沒有。
由於聚少離多，所以今季難得GoalTV有直播韋斯咸都不會錯過，而當中這「你永遠一個人睇波」的心路歷程也相當趣緻；首先，期待是甜蜜的，因為唔知幾時有短聚一次，興奮度不下於聖誕節的等待。然後尋找是刺激的，因為沒有奉旨的鋪天蓋地宣傳，所以要上網站揭報紙去找時間及台號；搵唔到是正路，搵到直頭要喊番句口號！若果英超西甲是街舖，英冠之流就係樓上舖，仲要係個個禮拜唔同樓層同單位，越講真係越似四樓有四仔！（呢個比喻太out，家陣無論睇乜都係上網，馬明話嘅）
好嘞，千辛萬苦睇得到啦，我又竟然、竟然好幾次喺直播埋牙之際，瞓着咗……Sorry，我都唔想，但場波實在太悶，個皮球大部份時間都喺空中飛來飛去；難得喺地面滾動時，烏普頓的水準可能仲差過修頓。我唔係有心想瞓，而係被催眠了，最慘嘅係擘大眼發現場波打完時，又和波，早知早啲唞好過；看韋斯咸打英冠，就是如此排除萬難，敗興而返。
OK，韋斯咸打英超時都係輸波多過乜，但因為一路定位為富豪霸權之中的一條硬漢，所以輸波係應份；但偶爾贏到一場以小博大的，就夠自我感覺良好一陣子。但係落去英冠呢，你都有今日囉，終於成為其他比你更窮的窮鬼眼中的班霸，每場波無論排名和主客，韋斯咸都是焗住被睇高一線那隊；所有對手都抱住打老虎的心情來搏命，偏偏鎚仔黨又確實有強隊之虛名，冇勁旅之食力，於是經常被人場外抽水、場內搶分。
BigSam家陣兩邊不是人，他想將韋斯咸保頓化，但球員根底的氣質是少爺仔，難得領先就自然放軟手腳，唔小心落後就自亂陣腳；最大件事是，大Sam發現最少爺脾氣的是球迷，他們每場都在大叫迪肯尼奧的名字及向球隊喝倒采。搞到大Sam要公開聲明：「我不是高Q大腳黨員，球迷誤會了！」我是韋斯咸的小羔羊，不會反抗，又會用一樣嘢去衡量隊波掂唔掂，就係睇波期間有冇瞓着！
文：keyman