馬國明（馬明）在無綫劇《OnCall36小時》中飾演的張一健醫生角色討好，被鄭嘉穎睇高一線，有望今年成為視帝，前晚獲無綫行政主席梁乃鵬厚待搞慶功宴。楊怡見到馬明攬到實，但一見緋聞男友羅仲謙即閃避，擺明「身有屎」要避嫌。
馬國明和楊怡主演的無綫劇《OnCall36小時》收視口碑俱佳，昨晚在將軍澳電視城西餐廳舉行慶功宴，由無綫行政主席梁乃鵬出錢請一班台前幕後及兩位顧問醫生等食飯，並承諾會開拍續集。最近忙於拍攝《名媛望族》的馬明和楊怡穿上戲服現身，楊怡大方蹺住馬明手臂影合照；但與謙仔合照時卻顯得避忌，一影完便走開。
草根醫生嘆茶記
馬明飾演的「張一健」被讚能媲美「程至美」醫生，他謙虛說：「聽講吳啟華冇睇，但聽到佢讚我都開心，佢係醫生icon，我哋呢啲downtoearth（草根），平時都係去茶餐廳，大家唔同類型。」對於被鄭嘉穎睇好做視帝，他說：「多謝嘉穎咁照顧我，平時畀好多意見，尤其係着衫。我都知自己冇taste，仍在努力改善中。」
馬明自知衣着品味差，楊怡亦有出手相助，被取笑會否阻人拍拖？他笑說：「唔緊要，買完就走，拍得耐都悶啦，要電燈膽充撐吓。」楊怡解釋：「我唔係踩佢呀，幫佢睇吓啫，作為朋友提點吓。」她亦不介意被人阻住拍拖，笑說：「時間一定有，車程時間都傾得。」
一家七口換大屋
馬明坦言工作量比以前多，雖稱不上大豐收，但亦有可觀獎金，他笑說：「梗係希望再多啲，我都想換大屋。」被取笑想金屋藏嬌，他說：「如果有錢都唔介意，其實我家同屋企人住，平時一家四口，到周末家姐仲帶埋兩個小朋友嚟，七個人住，真係冇乜地方走動。」
馬明是出名的乖仔，儲錢買樓亦不會嘆半句辛苦，笑言自己慳家，不捨得買車和名錶。他並透露下月將返上海拍《名》劇外景，預計稍後亦要開拍《衝上雲霄2》，故《On》續集可能要明年才能成事。
採訪：何慧斯 攝影：陳志嵐