特首選舉之日，左丁山上午在家睇電視直播，未到點票時刻，已經趕住入馬場，點解唔睇埋先呢？無他者，世態炎涼，現實就是如此，只見唐英年晨早就站在投票現場（會展）電梯口附近，與每一個行入嚟嘅選委打招呼，握手，禮貌十足。做候選人盡最後一分鐘努力，本應如此，何俊仁不在，大家心知肚明，但另一位候選人梁振英遲遲不見出現，為何如此托大？道理一字咁淺，劉延東與西環已同佢做足工夫，投票前兩三日兩張挺梁大報分別以「保700票」為標題，可知梁生勝券在握，另一份中間偏梁報更講到要取800票，以示贏得漂亮，既然係咁，梁生駛乜自己出馬吖。
只有一位李嘉誠，對唐英年有情有義，講得出做得到，見完習近平仍然堅持挺唐、誓不見風駛，如此牙齒當金使之商人，今時今日實屬少有，君不見其他大財團紛紛轉軚以維繫將來與梁特首嘅關係乎？劉皇發更走精面，既然北大人吩咐到，就對記者講：「我投票俾贏嗰邊」。佢咁醒目，試問好打得嘅林鄭月娥點樣去拆新界僭建？林鄭怕要低低地躀一鋪咯，梁特首肯在新界丁屋僭建方面支持林鄭？吾不信也。
睇電視畫面，知大局已定，仲唔去馬場做乜？入到馬場，見到大羣中文大學校友，原來呢日係「中大校友會聯會盃」，編在第四場第三班跑二千米。第三場就有選委K隻新馬「無懼風雨」初出，成為大熱門，選委K投完票就到馬場，都唔等點票了，問佢如何投票，佢有標準答案：「憑良心啦」，人人都係咁講，唔知良心偏梁還是偏唐。算嘞，在馬場不宜談政治，賽前有人問：「梁振英係唔係贏梗？」左丁山答：「買馬係咁容易就好啦，一號馬贏硬噃，三號馬只係輸幾多啫，嗱，梁振英得票少過700當輸！」好彩冇人願跟左丁山對賭啫，消息傳來，梁振英得689票，唐英年剩番285票，梁得票之少出乎意料之外，唔通有好多選委不領中聯辦之情？比601票只係多出88票，以低票率當選，弊啲喎，不過贏就係贏，贏了再說！選委K隻馬就唔同，輕鬆取勝，與馬主H隻天光明（第三）跑出一條新亞校友位置Q，好多在場中大校友應該中！