過咗商台做行政總裁嘅陳志雲，大前日喺候任特首梁振英接受商台訪問時，突然踩入直播室，即場要求梁振英承諾捍衞香港核心價值同言論自由。
其實志雲同梁振英都有啲淵緣，就係2008年北京奧運喺香港傳聖火嘅時候，正正係由梁振英交棒畀志雲。大前日志雲踩完梁振英場，喺夜晚就同無綫一班綜藝科監製同幕後工作人員，喺尖東富豪酒店食飯，擺咗五圍，當晚係班監製為志雲補搞歡送會。
監製爭助選
聽講飯局期間，志雲講起當年同梁振英傳送火炬，在場班監製即時起哄，話當年梁振英交棒畀志雲，似乎隱喻2017年志雲接梁振英棒做特首，跟住仲起哄叫志雲2017年選特首，成班監製話到時一定做義工幫佢助選，到志雲騎騎笑話：「可以諗諗。」
噚日馮仁昭打電話問志雲係咪有興趣選特首？佢話：「講笑咋，我何德何能？佢哋太抬舉我啦。」志雲話當晚林以諾牧師、陳敏之同寧進咁啱都喺富豪酒店飯局，佢哋三個亦有順道去佢嘅歡送會度打招呼。