噚日一班藝人去尖沙嘴出席「壹電視大獎2012」，今年都仲係無綫演員囊括大多數獎項，出年電視戰開始，到時就唔知係乜嘢環境。好多小生花旦都專登喺內地趕返嚟拎獎，好似大姐大佘詩曼、視后胡杏兒都專程停工飛返嚟。
咁多藝人北上搵食，阿佘算係最勤力嘅一個，不過最近有傳聞話因為佢睇唔實緋聞男友鄭嘉穎，放生咗佢去媾掂劉心悠，阿佘聽到照樣冇反應，仲話：「係咩，恭喜佢，我點睇實佢，我都冇時間。」之後阿佘仲好大方咁讚鄭嘉穎同劉心悠靚仔靚女好襯，都唔知係咪心個句。
講到最激動嘅就係楊怡，因為佢主演嘅《OnCall36小時》得到十大電視節目，佢上台致辭時候竟然開心到喊，佢話：「拍呢套戲嗰時自己病緊，好辛苦，呢套戲好多正面訊息畀大家，所以咁感觸。」
唔怕狼隊出沒
另外，陳豪女友陳茵媺都上咗橫店拍新劇《大太監》，近排狼隊出沒，怕唔怕女友出事先？佢話：「唔怕，有同劇同事會照顧佢，我同佢都有一日一電，應該無事。」
