A股噚日插3%，但港股都算硬淨，現貨收市後期指仲轉番高水。淡友話好消息盡出，只係大戶托住個指數結算，之後肯定有排插，好友就話振英哥上場，個市點都會好好睇睇。唐牛覺得個市一路走唔出20500至21700區間，用大型上落市去睇可能仲清晰。
四環醫藥（460）上周公佈業績唔算差，但股價曾跌近一成，有反彈空間。截至去年底，全年賺8.24億元（人民幣．下同），按年增長57.8%，以中期盈利3.8億元計，下半年盈利較上半年增16.5%，毛利率亦進賬4.7個百分點，去到76.5%，皆因擁有多項專利。
不過，最吸引係派息慷慨，除咗末期息2.5分，仲有特別息7.2分，現價齋計末期息都有近4厘，具防守力。作為內地心腦血管製藥龍頭，四環管理層講明會繼續併購，增長概念亦夠。噚日收報3.03港元（下同），跌2.3%，戰友可於2.95元吸納，博彈上3.20元，跌穿2.80元閃人。
唐牛