一秒鐘一百萬次點擊，誰人有此動員力量，諗吓都好驚。鍾庭耀搞網上投票，三月二十二日全日電腦系統癱瘓，問你點投！太太Y呢日到中環睇骨科專家，打針治療骨質疏鬆，之後走上嚟搵左丁山：「哈，原來醫務所就喺你隔籬間大廈，行過嚟好近啫。」佢順便話想用左丁山嘅電腦上網投票，點用吖，用智能電話，一樣唔得啫，太太Y問點解唔得，左丁山邊度識吖，惟有苦笑。太太Y心生不忿，話要搭104（巴士）到理工大學票站投票，最多排隊等候喎。左丁山周身唔得閒，真係冇法子去，惟有放棄。
中聯辦老早攻擊鍾庭耀搞模擬特首選舉，甚麼稿子都出齊，但萬萬料不到，竟然有黑客如期準時襲擊PopVote323，令有意網上投票嘅市民，冇法子進入網站。鍾庭耀如果唔係太過君子就係驚怕得罪黑客，初時居然話「網上力量龐大啫，未敢肯定係政治性打壓！」後來才去報警。龐大個屁，點會有「正當正經正常」嘅網民發動一秒鐘一百萬次點擊㗎！為咗特首競選而不惜用盡一切極端手段，發動龐大襲擊之有心人，實在其心可誅，非常卑鄙。
二十二日下午到置地廣場飲下午茶，在街上碰到馬主C，順口問佢係唔係選委，佢立即耍手擰頭：「好彩唔係，否則會俾人call上深圳，點搞！」哦，如果佢係挺梁派，就唔使上深圳見劉大姐啦，被召者多是挺唐派，上去吃貓麪之嗎。馬主C話：「靠咁大力抬轎，先至上到政府山，入咗去之後，抬轎佬走晒，點算？」咁又未必，抬轎佬抬得佢上山，自不然會送佛送到西，日日要佢稟報，接受西環命令，西環佛祖垂簾聽政，甚麼「五十年不變，港人治港，高度自治」，皆因有人做吳三桂或石敬瑭提早消亡。更可笑者，有記者為某人不受商界歡迎而辯護，竟然話係香港有馬房文化，不接受某人上台，令中央感到震驚和憂慮，公然挑戰中央，有人提議將特首普選延遲十年。哦，中央話邊個就邊個，不如索性用番97前制度，派個英國政壇失意嘅彭定康嚟香港做特首，大家唔准爭囉，派失意薄熙來到港做特首最就手嘞，以後豈止特首普選延遲10年舉行，直情永遠冇得選！