中國國寶熊貓，我哋都好關心佢哋傳宗接代，之前香港兩隻熊貓盈盈、樂樂交配失敗，搞到唔少香港人失望；足球員喺日本亦有國寶級地位，中田英壽、中村俊輔同本田圭佑都算得上國寶，而近期最紅嘅當然係喺多蒙特打到識飛嘅香川真司啦！香川前日就入場支持日本女團打世界乒乓球錦標賽，唔通同隊中出名「可愛」嘅福原愛擦出愛火花？
香川「一王三后」好艷福
世界乒乓球團體錦標賽喺德國多蒙特舉行，亦即係香川真司地頭。周日喺德甲幫多蒙特省入兩粒，大炒科隆6:1後；香川周一得閒，梗要入場支持同鄉啦，仲客串講吓波㖭！日本女團有足球國寶撐場自然好醒神，輕鬆大勝波蘭3:0，喺C組3連勝。
而負責打頭陣嘅「瓷娃娃」福原愛亦以3:0擊敗對手施辛高絲卡。比起贏波，愛妹最開心就係賽後獲贈香川嘅多蒙特波衫；香川唔單止簽埋名，仲加上世界第一字眼，鼓勵愛妹做世界「1姐」㖭！愛妹就送番塊球拍畀香川做回禮。
香川真司同福原愛都係日本知名運動員，同樣係23歲，講真都幾夾；原來愛妹都好欣賞香川㗎，佢賽後話：「佢一個人離開日本去咁遠嘅地方，取得咁偉大嘅成績，真係好厲害！」雖然香川之前講過，自己一早已有女友，但郎才女貌，如果同愛妹一齊，相信係唔少日本人嘅主觀願望。
話時話，香川真司呢晚認真好艷福，因為日本電視台安排咗前「早安少女」成員紺野朝美同佢拍檔講波；加上日本女團又有福原愛同石川佳純兩大靚女壓陣；香川平時踢波一個扭三個就叻，今次「一王三后」，佢又搞唔搞得掂呢？
世錦賽中國今鬥香港
講開呢個乒球世錦賽，中國同香港都有參加。男團方面，中國噚日以3:0贏瑞典，取得A組3連勝；香港同日亦以3:0擊敗希臘，又係喺A組未嘗一敗。今日中、港就會交手，相信會有一番激戰。女團方面，香港以2:3不敵俄羅斯，在D組2連勝終止。