昨日密西比寫雨潤（1068），我海迪都忍唔住插兩句咀。首先雨潤去年上半年上游業務嘅屠宰量，係增長32%。下半年9月雨潤有一隻豬喺廠內被驗出有事，即時銷毀，只有幾份內地報紙報道咗幾日；但公司話就係因為呢一隻豬，搞到下半年屠宰量掉轉頭跌10%以上，仲勁過有產品下架、負面新聞鋪天蓋地的同業雙匯。有分析員同海迪講，單計第四季，雨潤應該係「負毛利率」，即係寧願蝕都要賣豬肉出街，慘情到海迪都唔識點解釋。
另一樣最令人費解嘅，就係雨潤嘅現金流。公司一早就話去年資本開支計劃使30億（人民幣．下同），點知最後埋單計數，使咗48億，多咗足足18億，仲幾乎全部都係下半年使凸！海迪當起一間廠要使3億，18億即係搞多咗6間廠！乜唔係要蝕賣豬肉咩？咁擴充法，真係咁好景？
過去半年，海迪每次同芬佬講起呢隻股，無一個唔鬧爆。雨潤係明星股，連續三年每年都有幾成增長，邊到搵呀？就算主席祝義材每年批股套現都好啦，都仲係有大把基金爭住揸。點知舊年雨潤突然同大家講，因為有「負面新聞」令銷量大跌。
就算家出埋盤數你睇，大家都仲係抓晒頭，諗唔明。海迪奉勸各位，諗唔明嘅嘢就唔好掂喇！
海迪