自《反斗奇兵》開始，Pixar動畫已成大人細路必愛作品，今次Xbox360仲畀個機會大家，走入呢個繽紛好玩嘅Pixar世界，同胡迪、麥坤、羅小飛齊齊大冒險；用Kinect玩唔使手掣，上天下海全部Fing手Fing腳親力親為，好玩過癮之餘，仲可順便減埋肥迎夏日。
記者：韓繼聰
Model：Christie
原創角色殺入劇情
今次Xbox360搵齊《反斗奇兵》、《五星級大鼠》、《沖天奇兵》、《超人特攻隊》同《反斗車王》五大紅爆作品，畀你闖入佢哋嘅世界玩餐飽！遊戲一開始，玩家只係一個普通小豆丁，進入「Pixar樂園」周圍探險，而五套動畫就分別代表樂園五大世界，進入不同世界後，玩家扮演嘅並唔係麥坤、胡迪等主角，而係原創新角色，讓玩家更有參演埋一份嘅投入感。好似《反斗奇兵》咁，玩家化身成機械人，同胡迪、巴斯光年，一齊協助Bonnie返回主人身邊。而《超人特攻隊》世界，玩家就扮新超人，夥拍超人家族力戰機械人TheOmnidroid，營救出Mirage。
唔會死無限挑戰
遊戲雖分咗五大世界，但其實玩法差唔多，都係做唔同動作，去完成各項任務。當然，每個世界都有自己特色，好似《五星級大鼠》咁，故事以逃避洪水為背景，玩家好多時都要「伸手」撐船、游水、甚至潛水等動作。至於《反斗車王》就玩揸車，鬥快之餘仲要求甩尾技巧，反應慢啲都唔掂！玩完一輪，ModelChristie最愛係《超人特攻隊》：「可以扮超人真係好型，加上冰上滑行、決戰巨型機械獸等，好刺激！」
話晒合家歡遊戲，梗有HappyEnding，最正係不設GameOver，超人唔小心跌落街？唔使驚，有得俾你無限試跳，唔怕小朋友玩到有挫敗感。Christie又跑又跳玩成兩粒鐘，「全身都要郁，攰死我，不過都好，就嚟夏天，當減肥囉。」
《KinectRush:ADisney．PixarAdventure》
機種：Xbox360
類型：Kinect動作
遊戲人數：1-2人
售價：$259
