特首選舉，拉票變成劫票，打劫個劫，一啲挺唐選委好似俾人揸住枝槍指住個頭，夾硬要扭軚轉彎，如此劫票法，一號梁振英雖可入住禮賓府，慰先父在天之靈，但全港市民知道佢民意調查民望只有三成五，自己去拉票唔夠601，要中央大員及本地中聯辦人員親自出動，先至搶到足夠票數獲選，雖然最後勝利，實在毫不威風，七月一日後不知如何管治香港。佢嘅支持者基礎已經露晒底，就係傳統左派及二線財團及非一線專業人士，得唔到主流商界及財金界支持，高級公務員又發匿名公開信攻擊佢，睇嚟佢會組班困難，新班子會係十多年來最殘弱嘅。
呢啲嘢講得多都會悶，吃完午飯在皇后大道中遊蕩，碰上依家在中環上班嘅著名評論員，問佢點睇，佢竟然話：「收聲啦，以後我會扮鵪鶉，少講為妙，寫稿都寫少啲。你都係呀，以後寫多啲風花雪月，講飲飲食食啦！」真係？會唔會忍到心口悶呀？評論T話：「心口悶好過心口腫噃！」言畢揚長而去。
唉，李澤楷都收到中聯辦訊息，叫「信報」要醒目……小小寫稿佬以後點辦？好彩寫稿佬從來冇地位，中聯辦嘅電話只會打俾大老闆，連總編輯都費事理睬。唔知肥佬黎有冇收過電話呢？相信佢可能係全港媒體老闆中，最唔會聽西環電話嗰個。唔好以為呢啲事係作大，實則久而有之。回歸之前，特別係一九八九年之後幾年，跑馬地（現已搬去西環）不時有人打電話向大老闆講俄文，老闆聽咗兩三次之後，就會請總編輯食餐午飯，食到甜品之時，老總L就會收到老闆訊息：「你嘅社論寫得好好呀，跑馬地成日睇，幾重視，佢地話俾我聽，如果你立論中肯啲就更好喎！」老闆講乜嘢呢？點樣先算「中肯啲」呢？留番俾老總L去諗嘞。這些年來左丁山與老總L已退出報壇，不了解現時運作情況，想不到竟然有西環人馬致電李澤楷，想來亦係新瓶舊酒啫，但有報紙轉軚，識做到修改劉銳紹嘅評論文章，由「唐梁都不值得幫」改為「兩人中揀，寧揀梁振英」，離譜之至，梁振英上台後，新聞自由/言論自由千古？