趣趣地：巴西警放狗咬球員

「落閘、放狗」唔單係對付不受歡迎人物，竟然連球員都受害；話說一場巴西地區聯賽，卡斯亞斯主場對咸堡高嘅球賽，卡斯亞斯因不滿裁決，同旁證爭論；維持秩序嘅警察同警犬，原本想勸開球員，不過德國狼狗品種嘅警犬，竟發惡咬向卡軍前鋒雲達拉爾嘅大腿（圖），搞到佢要接受軍醫治療，好彩傷勢唔係好嚴重，佢可以繼續比賽，卡斯亞斯亦都贏1:0。