正所謂商場冇永遠嘅朋友，亦冇永遠嘅敵人。華華噚日翻開兩份本地黨報，見到恭賀CY登基廣告專輯，發現唔只各大小公司、鄉親社團都爭住向候任特首示好，場面熱鬧到好似新正頭咁。
地產商識做示好
睇真啲，原來連班早前力撐唐唐嘅地產大孖沙都有份，仲差唔多全港啲地產商都齊晒。但華華搵吓搵吓，惟獨搵唔到長實嘅，超人投票日仍然支持唐唐，家都冇因為佢落敗而即刻變心，睇嚟誠哥比起唐唐有腰骨得多。
睇番恭賀名單，包括多間早前高調撐唐嘅地產商，好似信和、恒基、新地等等。大商家向錢看好正常，好多人都傳CY上場會推出對樓市不利嘅政策，班地產商梗係要識做，借機同候任特首打好關係啦。
除咗地產商，仲有好多商會、同鄉會、聯誼會，CY母校英皇書院就實走唔甩啦，最搞笑嘅係有啲唔多關事嘅公司，好似恆宇仁龍拳都有份，真係當賣農曆新年廣告咩？但最令華華睇唔順眼嘅，就係港鐵嘅賀稿，你呢頭話要加價，嗰頭竟然走去用市民同股東嘅錢去賀小圈子選舉，真係同港大學生會一樣：亂使錢！
李華華
mailto:[email protected]
